Real Madrid តែងតាំងគ្រូបង្វឹកថ្មីហើង បន្ទាប់ពីគ្រូបង្វឹកចាស់ត្រូវដេញចេញ

នេះបើយោងតាមប្រភពពី សហព័ន្ធបាល់ទាត់អេស្ប៉ាញ បានឲ្យដឹងថា ក្លឹបយក្សរបស់ La Liga បានផ្ដល់កុងត្រាផ្លូវការមួយដល់ Solari ហើយក្លឹប Real Madrid ក៏បានសម្រេចតែងតាំងអតីតគ្រូបណ្ដោះអាសន្នគឺលោក Santiago Solari ជាអ្នកចាត់ការពេញសិទ្ធរបស់ក្លឹបផងដែរ។

ប៉ុន្តែមិនទាន់បានប្រកាសថា មានរយៈពេលប៉ុន្មានឆ្នាំនៅឡើយទេ សម្រាប់បុរសវ័យ៤២ឆ្នាំរូបនេះ ក្នុងការចូលកាន់តំណែងកាលពីខែតុលា ថ្ងៃទី២៩ បន្ទាប់ពី Real បណ្ដេញលោក Julen Lopetgui ចេញពីតំណែង។

ក្រោមការដឹកនាំ៤ប្រកួតដំបូងកន្លងមករបស់អ្នកចាត់ការសញ្ជាតិអាហ្សង់ទីន ក្រុមអធិរាជស Real Madrid ឈ្នះទាំង៤ដង វាជាកំណត់ត្រាល្អបំផុតមិនធ្លាប់មានអ្នកចាត់ការណាធ្លាប់ធ្វើបាន ក្នុងប្រវត្តិសាស្ត្ររបស់ក្លឹបឡើយ។ ៤ប្រកួតនោះគឺបានយកឈ្នះ ក្រុម Melilla, Viktoria Plzen, Real Valladolid និង Celta Vigo។

Real ស៊ុតចូលគូប្រកួត១៥គ្រាប់ និងរបូតតែ២គ្រាប់ប៉ុណ្ណោះក្រោមការដឹកនាំរបស់អ្នកចាត់ការរូបនេះ ហើយបច្ចុប្បន្នកំពុងឈរលេខទី៦ ដោយចាញ់ក្រុមកំពូលតារាង Barcelona ត្រឹមតែ៤ពិន្ទុប៉ុណ្ណោះ៕